Lorik Cana, kapiteni i kombëtares shqiptare, ka dalë sot në një konferencë për shtyp, teksa edhe njëherë përsëriti se Shqipëria do kërkojë të lërë gjurmë ne Europian duke kaluar grupet.
“Është kënaqësi që jemi këtu për të përgatitur një event kaq të madh të cilin e kemi pritur kaq shumë. Eshtë e vështirë për të thënë sa pikë. Mundemi që me një fitore të kualifikohemi, dhe deri në ndeshjen e fundit jemi në lojë. Edhe këtë radhë nuk është ndryshe, pasi ndeshja e parë është e rëndësishme. Është kundërshtar i vështirë dhe do përgatitet po ashtu si ne”.
Për Canën ky Europian është i veçantë për disa arsye: “Në jetë ka disa gjëra simbolike apo shenja të fatit që janë për tu habitur. Përveç evenimentit që të gjithë prisnim, për mua është e veçantë pasi luhet në Francë aty ku unë kam luajtur, do luajmë në Marsejë ku jeton familja ime. Do luajmë ndaj Zvicrës ku jam rritur. Ndeshja e parë ndaj Zvicrës ka qenë më 11 qershor 2003, edhe kësaj radhe ndaj tyre, luhet më 11 qershor dhe kjo është dicka e veçantë”.
Kualifikimi i Shqipërisë ka bërë jehonë në gjithë botën, dhe kapiteni shprehet se ata duhet t’i përgjigjen kuriozitetit të njerëzve për t’i parë.
“Një arritje e madhe, pasi ka bërë jehonë në skenën botërore. Flitet për Shqipërinë në Azi, Afrikë dhe Amerikë, na bën krenar. Shton kuriozitetin e njerëzve të na shohin për herë të parë në Europian. Duhet t’i përgjigjemi këtij kurioziteti. Ne jemi rritur shumë në nivel futbolli. Po dalin shumë talente që dalin nga Shqipëria. Kjo është frut i një pune 20-vjeçare”.
Cana e sheh pranimin e Kosovës në UEFA dhe FIFA si një mundësi zhvillimi të sportit: “Gjithmonë ka patur përfaqësuese, ndërsa tani kemi një kombëtare, pasi përfaqësohen të gjithë shqiptarët. Ashtu siç ka thënë edhe presidenti Armando Duka, e kemi mbështetur Kosovën dhe duhet parë si një mundësi për zhvillimin e sportit dhe jo si përfaqësim në vetvete. Duhet ta shohin si mundësi zhvillimi, e ndoshta në të ardhmen të shpresojmë në një bashkim”.
Në fund ai flet edhe sezonin e tij te Nanta dhe formën e tij, e nuk mungojnë as batutat.
“Kam luajtur mjaftueshëm, 25 ndeshje me skuadrën, 7 me kombëtaren dhe për një sezon është numër i kënaqshëm. Kam ritëm, kam vuajtur pak nga mesi, problemet e pleqnisë (qesh), por tani jam mirë. Kemi dy javë në dispozicion por do të jemi gati.
“Pushimet nuk i kam rezervuar, ku nuk e di por datën, pas 11 korrikut (qesh)”.
