“Franca nuk mund t’i presë të gjithë!” Ka qenë ky paralajmërimi i presidentit Francez, Emmanuel Macron gjatë një interviste televizive, duke forcuar kështu retorikën e tij të ashpër për emigracionin.
Macron javën e kaluar ka sinjalizuar një linjë më të ashpër të emigracionit në gjysmën e dytë të mandatit të tij, duke argumentuar se qeveria duhet të ndalojë votuesit të shkojnë drejt ekstremit të djathtë.
Ai vuri në dukje se Franca kishte parë një rritje të numrit të njerëzve që kërkonin azil, që nga zgjedhjet presidenciale të vitit 2017 dhe tha se ishte i nevojshëm bashkëpunimi shumë më i fortë evropian.
“Nuk ka bashkëpunim të mjaftueshëm në Evropë dhe ne duhet të shikojmë këtë fenomen migrator dhe të marrim vendime,” tha ai.
Komentet e Macron vijnë ndërsa parlamenti francez ka vendosur që javën e ardhshme të mbajë një debat të madh mbi politikën e emigracionit.
Gjatë intervistës ai përmendi Shqipërinë dhe Gjeorgjinë, mes vendeve me numrin më të lartë të azilkërkuesve në Francë.
“Shpresoj që këto vende të reflektojnë”, tha Macron, duke ju referuar faktit se si Shqipëria ashtu edhe Gjeorgjia janë në listën e vendeve të sigurta./ Opinion.al
