Konflikti me armë i Lefter Zhidrut me policinë ditën e djeshme mbajti peng për rreth 5 orë lagjen “11 Nëntori” në Elbasan.
71-vjeçari u ekzekutua në fund nga forcat RENEA pasi refuzoi të dorëzohej dhe vijoi rezistencën me armë zjarri.
Banorët e pallatit ku ai jetonte me gruan dhe vajzën e mitur thonë se Zhidru ishte problematik dhe se kishte patur konflikte me gjithë banorët e pallatit. Ata mohojnë që ai të ketë qëlluar me armë më parë por theksojnë se ai ishte i dhunshëm dhe rrihte grua e tij.
“Shumë problematik ishte. Problematik me njerëzit te pallati. Me të shoqen, ziheshin, griheshin, e zhdapte gruan në dajak. Shumë i keq. Për gocen nuk e di a ka qenë e dhunuar. Zihej me pallatin të gjithë. E gjet nga e vetja ai. Ta mbajmë mend çfarë kemi heq.”, tha një nga fqinjet e familjes për ABC News.
Kurse një tjetër fqinje, u shpreh se 71-vjeçari përpara se të ngjarja të përshkallëzonte ishte duke bërë sherr me të shoqen.
“Goca bërtiste. Pastaj iku gruaja iku, shkoi në polici.”
Megjithatë, një tjetër panoramë paraqitet në fshatin e tij të origjinës. Lefter Zhidru ishte nga fshati Xarrë i Sarandës. Banorët e fshatit e thonë se ai kishte punuar zetorist dhe ishte njeri i ndershëm e i respektuar.
Ata tregojnë se Lefteri kishte një djalë që banonte në Xarrë por ishte me probleme të shëdetit mendor.
“Lefterin e kemi njohur si njeri punëtor, zetorist dhe njeri i ndershëm. Ka patur edhe këtu probleme familjare sepse gruan e parë e shkëputi. Këtu ka blerë një tokë se kishte ndërmend të bënte një ofiçinë këtu. Kam kohë që nuk kisha komunikuar me të. Vinte vazhdimisht sepse ka patur problem me fqinjët atje. Djalin e mori 2-3 herë por nuk i qëndronte atje.”, tha një banor i fshatit për ABC News.
“E kam njohur që shpejt, nuk ka qenë problematik, ishte zetorist, njeri i dalluar. Për mua ka qenë njeri i respektuar me shoqërinë dhe me vëllazërinë. Kur ka ikur në emigrim nuk e di çfarë ka ndodhur. Ata janë vllehnj, por kishim bashkëpunim se ishte njeri i mirë.Këtu ka një djalë që jeton i vetëm por nuk është mirë nga shëndeti. Kohët e fundit u bë problematik por policia na tha që nuk mund ta marrim dot sepse nuk i del njeri për zot.”, tha një tjetër banore. /Opinion.al
