Mbrëmjen e djeshme, një zjarrvënie e cila rezultoi të ishte e qëllimshme tronditi kryeqytetin. Blitz.al raportoi se rreth orës 22:30 të mbrëmjes në parkingun e qendrës së bizneseve “Olimpia” i është vënë zjarri makinës së producentit Flori Mumajesi.
Me një karrierë të gjatë mbi supe, producenti i njohur ka qenë gjithnjë në qendër të vëmendjes dhe ndër emrat më të lakuar për sa i përket muzikës. Krijuesi i shumë prej këngëve më të pëlqyera shqiptare dhe i labelit “Three Dots”, ka punuar shumë për të arritur suksesin që ka sot, por mesa duket kjo nuk u ka pëlqyer personave që qëllimisht vendosën ta dëmtojnë në këtë mënyrë. Në gjithë këto vite punë për të krijuar muzikë për vete dhe për artistët e tjerë, Flori Mumajesi ka dhënë gjithnjë shembullin se edhe mes kolegëve mund të ketë miqësi, madje mund t’i konsiderosh edhe si familje, siç janë të gjithë artistët e “Three Dots”.
Nuk dihen ende motivet e këtij sulmi, që mund të ishte kthyer në tragjik ndaj artistit, por fatmirësisht nuk ka pasur asnjë person të dëmtuar. Dëmi i vetëm ka qenë djegia e makinës, prej të cilës Blitz.al ka siguruar edhe disa foto.
Pas ngjarjes, policia ka nisur menjëherë hetimet, ku nëpërmjet pamjeve filmike është vërtetuar se ka qenë një zjarrvënie e qëllimshme. Deri tani nuk është vënë asnjë autor në pranga, gjithsesi premtohet një punë intensive për zbardhjen e ngjarjes dhe kapjen e autorëve.
Shpresojmë që kjo çështje të zgjidhet sa më shpejt dhe artistët të mos shpërblehen në këtë mënyrë, por të marrin atë që meritojnë: dashurinë e publikut dhe mirënjohje për punën që bëjnë./Blitz.al
