Autoriteti Kombëtar i Ushqimit (AKU) ka bllokuar tre lokale në Jalë, një nga zonat më të frekuentuara gjatë verës nga turistët, për shkak të shkeljeve të rënda të standardeve të sigurisë ushqimore.
AKU njofton se gjatë aksionit që po ushtron në zonat bregdetare, trupa inspektuese DRAKU, Vlorë ka evidentuar 3 subjekte, dy me aktivitet Restorant dhe një Fast Food, ku kryenin veprimtari në kundërshtim me standardet e sigurisë ushqimore, si dhe në kushte të rënda higjieno-sanitare.
Mësohet se ndaj këtyre subjekteve, respektivisht restorant “Lavdoshi”, restorant “Kapiteni” dhe fast food “Spiro Kreku”, janë marrë masë administrative gjobë me 300.000 lekë për secilin, por edhe bllokim i menjëhershëm i aktivitetit.
“Autoriteti Kombëtar i Ushqimit inkurajon të gjithë qytetarët të denoncojnë çdo rast, çdo tentativë abuzimi, pranë Autoritetit Kombëtar të Ushqimit në [email protected] si dhe pranë portalit të bashkëqeverisjes “Shqipëria që duam” Siguria Ushqimore është një sfidë e përbashkët”, thuhet në njoftim.
