Ndërsa lëvizja e lirë në vend është kufizuar në 2 fasha të përcaktuara orare, një fenomen që ka nisur të vihet re që ditën e djeshme veçanërisht në Tiranë, është kërkesa e lartë për shërbime bankare. Në këto foto të publikuara edhe në rrjetet sociale, shihet se qytetarët mbajnë radhë të gjata për të marr shërbime të ndryshme në bankë, apo edhe për të kryer kërkesat për shtyrjen e këstit të kredisë.
Ndonëse thuajse të gjitha bankat operojnë tashmë edhe me shërbime online, një pjesë e qytetarëve për arsye nga më të ndryshmet janë të detyruar të paraqiten në sportelet bankare, veprimtari që duhet ta kryejnë në oraret e përcaktuara të lëvizjes së lirë 06:00- 10:00 dhe 16:00-18:00.
Sikurse shihet edhe nga fotot, pa respektuar distancat e nevojshme për të parandaluar rrezikun e përhapjes së koronavirusit, qytetarët bëhen kështu rrezik për veten dhe personat që ju qëndrojnë pranë. Edhe pse mbrëmjen e së enjetes në “Opinion”, Kryeministri tha se për shërbimet bankare do të ketë tolerancë të lëvizjes, kjo duket se ka qenë e pamjaftueshme për të mbajtur larg radhët e gjata./Opinion.al
