Qindra shqiptarë të ardhur nga vende të ndryshme të Europës, mesditën e sotme, janë mbledhur përballë gjykatës së qytetit Colmar në Francë, në shenjë proteste ndaj arrestimit të ish-kryeministrit të Kosovës, Ramush Haradinaj, për shkak të një urdhër-arresti ndërkombëtar të lëshuar nga Serbia për krime lufte.
Protesta është organizuar nga shqiptarët që jetojnë dhe veprojnë në Francë, të përkrahur edhe nga Shoqata “Lëvizja”. Organizatorët u kanë bërë thirrje të gjithë shqiptarëve që ndodhen në Francë, Zvicër, Gjermani dhe vende të tjera të Evropës, që të shtunën në mesditë të marrin pjesë masivisht në protestën në përkrahje të Ramush Haradinajt, i arrestuar këtë javë nga autoritetet franceze të drejtësisë.
Qëllimi i protestës është kërkesa për lirimin sa më të shpejtë të Haradinajt dhe hedhjen poshtë të të gjitha urdhër-arresteve që datojnë nga regjimi i Millosheviqit.
