“Ndërkombëtarët tepsia e gjithë tepsive”. Është ky mesazhi që ka zgjedhur të japë Dilaver Nela, i njohur për formën e veçantë të protestave të tij. Gjatë vizitës së Zëvendës Ndihmës Sekretarit të Shtetit Matthiew Palmer në Tiranë, Nela kërkoi t’i përçonte një mesazh, duke thënë që mos të mendonte për politikanët, por për shqiptarët.
Dilaver Nela tashmë është i njohur për mesazhet që jep. Gjatë ceremonisë së dhjetë vjetorit të Shqipërisë në NATO, ai ishte i pranishëm në sheshin “Nënë Tereza”. “NATO, çliro shqiptarët nga kryetarët”, thuhej në pankartën e tij, ndërsa në kokë mbante një tepsi.
54-vjeçari nga Laçi ka qenë i pranishëm thuajse në të gjitha protestat e kohëve të fundit, duke dhënë mesazhe kundër të gjithë klasës politike shqiptare. Në protestën e 16 marsit, ai mbante parullën “S’ka Shqipëri, ka 3 tepsi”, ndërsa në tre tepsitë që kishte sipër kokës kishte shkruar emrat e tre partive kryesore, PS, PD dhe LSI./Opinion.al
