Deputetja e LSI-së, Monika Kryemadhi, sot, i është përgjigjur deklaratës së kryeministrit Edi Rama të bërë mbrëmjen e djeshme në emisionin “Dritare” të gazetares Rudina Xhunga; se ajo nuk duhet marrë seriozisht në lidhje me 6 mijë vendet e punës që i ikin Shqipërisë si pasojë e krizës politike mes Ramës dhe Bashës.
Kryemadhi me anë të një fotoje të postuar vetëm pak minuta më parë në profilin e saj në Facebook, dëshmon realitetin e deklaratave të bëra ditët e fundit, se nga kriza politike dhe tensioni politik mes Bashës dhe Ramës; 6 mijë vende pune i ikin Shqipërisë në 60 ditë.
Ajo ka treguar vetëm dy ditë më parë se kriza politike në vend ka sjellë humbjen e vendeve të punës. Kryemadhi deklaroi se sa herë që Rama sulmon Bashën, humbin 10 vende pune dhe anasjelltas, duke theksuar se në 60 ditë që është ngritur çadra, Shqipëria ka humbur 6 mijë vende pune.
Në lidhje me këto deklarata, kryeministri Edi Rama, dje, ka deklaruar se deputetja Kryemadhi nuk duhet marrë seriozisht. Rama tha se deklaratat e saj nuk duhen marrë seriozisht, pasi LSI-ja është partnere në koalicion dhe llogaria sa vende pune janë humbur që kur u ngrit çadra është një llogari elektorale dhe retorikë politike.
