Qindra qytetarë të qarkut të Kukësit dhe shumë të ardhur nga Kosova, të shtunën paradite, pikërisht në vendin ku ishte përcaktuar pagesa e tarifës për automjetet që do kalojnë në Rrugën e Kombit, u mblodhën për të kundërshtuar me forcë çmimin e lartë të pagesës.
Protesta e nisur në orën 11:00 ishte njoftuar si protestë paqësore prej pushtetit vendor, por më pas degjeneroi në dhunë dhe akte të tjera vandale.
Protestuesit hodhën gure në drejtim të policisë dhe më pas nisën shkatërrimin e kabinave të ngritura për të mbledhur tarifën.
Pas disa minutash përplasje, policia u tërhoq duke u lënë hapësirë protestuesve të shfrynin zemërimin e tyre.
“Na kanë vënë litarin në fyt. Të heqin traun. Të hiqet trau direkt. Policia na qëlloi me shkopinj gome”, tha një prej protestuesve.
Banorët kudnërshtojnë të paguajnë tarifën për atë rrugë, për të cilën thonë se kanë paguar disa herë më parë, duke kujtuar këtu edhe taksën ‘Majko’ në fillim të viteve 2000.
Nga protesta raportohet se ka të lënduar nga radhët e policisë dhe banorëve.
Një ditë më parë kryeministri Edi Rama tha se do të ketë tarifë më të ulët për banorët e Kukësit, por jo përjashtim.
Zyrtarisht edhe qeveria e Kosovës e ka kundërshtuar taksën, duke thënë se ajo pengon tregtinë dhe zhvillimin ekonomik të dy vendeve.
