Një foto është duke qarkulluar në rrjetet sociale dhe në disa portale, ku shihet kreu i Libra-s, Ben Blushi përkrah një personi të ngjashëm me Lulzim Berishën, ish-kreun famëkeq të bandës së Durrësit, i liruar disa muaj më parë nga burgu.
Për të gjithë ata që e kanë harruar, kujtojmë se kreu i bashkisë së Durrësit, Vangjush Dako dhe koordinatori i fushatës së PS në këtë qark i çoi një letër gjykatës ku thoshte se Lul Berisha nuk përbën rrezik për komunitetin dhe do angazhohet në punët publike të bashkisë. Edhe pse u urdhërua një hetim për gjyqtarët që vendosën të lirojnë Lul Berishën, asgjë s’ka ndryshuar, ai është një qytetar i lirë i Durrësit.
Sot duket se në kurth ka rënë edhe Blushi i cili ndodhej për fushatë në qytetin bregdetar. Në mesin e dhjetëra qytetarëve që kërkojnë të pozojnë me politikanët gjatë fushatës duket se ka qenë edhe Lul Berisha.
Opinion.al mësoi nga stafi i Blushit se “ai nuk i njeh të gjithë qytetarët që i afrohen për foto”. Madje, as nuk janë të sigurt, edhe tani, nëse personi në krah të kreut të Libra-s është Lul Berisha. Duke kujtuar fjalimin e Blushit në parlament për lirimin e tij, zor të besojnë se Blushi ka pasur ndonjë dëshirë të madhe për këtë foto…
Opinion.al gjithashtu mësoi se fotoja në fillim është shpërndarë nga stafi elektoral i PS-në në Durrës. Dhe duket qartë se kërkohet të intimidohet Ben Blushi me një foto dhe me emrin e një personi që nuk i dihet deri më tani asnjë lidhje. /Opinion.al
