Në rrugët e Rio de Zhaneiros u zhvillua dje gara e maratonës për femra, e cila u fitua nga atletja keniane Jelagat Sumgong (2h24’04”), që mori edhe të artën. Në vendin e dytë u rendit Jepkiui Kirëa e Bahrein (argjend) dhe e treta etiopiania Mare Dibaba (bronz). Ato varën në qafë medaljet e garës më të vështirë të atletikës, por në qendër të vëmendjes nuk kanë qenë vetëm fitueset, të cilat u ngjitën në podium.
Finishi i maratonës ishte vendosur në rrugën ku zhvillohen karnevalet, ku festuan e kërcyen edhe disa atlete të tjera. Por në startin e saj kanë qenë edhe dy çifte binjakesh një çift trinjakesh. Në vendin e 10-të e të 11-të, kanë mbërritur me kohën e njëjtë 2h28’36” motrat binjake nga Koreja e Veriut, Hye Sin Kim e Hye Gyong Kim. Ato mbërritën të kapura dorë për dore në finish dhe shpesh gjatë garës kanë ndihmuar e inkurajuar njëra-tjetrën kur ishin në vështirësi. Por kurrë nuk u tërhoqen dhe arritën një rezultat të mirë.
Në maratonën e pagëzuar me emrin “maratona e binjakeve” ishin edhe motrat gjermane Anna e Lisa Hahner, që ashtu su koreano-verioret mbërritën së bashku në finish. Por rezultati i tyre ishte shumë i lartë, duke prerë vijën e finishit në vendet 81 e 82vendet . Ato përqafohen në finish duke qeshur se cila u rendit më mirë. Por edhe ato, kanë garuar së bashku gjatë gjithë kohës, duke mos humbur ritmin dhe treguar se familja është mbi të gjitha.
Së fundi, janë motrat trinjake nga Estonia. Nga tri motra vetëm dy e mbyllën garën: Lily Luik u rendit në vendin e 97-të, ndërsa Leila u rendit në vendin e 114-të. Nuk mbërriti dot deri në finish Liina, që u tërhoq në mesin e garës. Por të trija u përqafuan në fund, duke qenë së bashku gjatë gjithë kohës. Motrat trinjake nga Estonia kanë qenë kopertina e delegacionit estonez në Rio dhe në finish, ato kanë respektuar vendin organizator, duke kërcyer samba, duke qenë kartolina më e bukur e “Rio 2016”.
