Dita e pestë e protestës për vrasjen e të riut Klodian Rasha, u mbyll mbrëmjen e së dielës nga sheshi “Skënderbej”, ku edhe nisi.
U duk në fakt se e sotmja do të ishte një protestë ndryshe, pa incidente dhe përplasje me policinë. Protestuesit të thirrur në rrjetet sociale, kanë nisur një marshim nga sheshi Skënderbej. Ata kanë refuzuar kërkesën verbale të policisë për t’u shpërndarë, sepse në kushtet e pandemisë ishte e ndaluar, por kanë vijuar të ecin përgjatë bulevardit. Ndëraa kanë kaluar para Ministrisë së Brendshme e më pas tek Kryeministria, protestuesit në ndryshim nga ditët e tjera nuk kanë kryer dëmtime të objekteve publike, por thjesht kanë thirrur me pankarta në duar.
Në mënyrë simbolike, ata janë shtrirë përpara Kryeministrisë duke inskenuar një moment arrestimi. Më tej nën thirrjet që kërkonin lirimin e të ndaluarve gjatë këtyre ditëve, protestuesit kanë mbërritur para Drejtorisë së Policisë së Tiranës.
Deri në atë moment, policia që dukej se kishte ndryshuar strategji për të mos patur reagim, vendosi një kordon të Forcave të Ndërhyrjes së Shpejtë, duke mos i lejuar protestuesit të afrohen në zonën para godinës.
Është ky momenti, kur për shpërndarjen e protestuesve policia e cila deri në atë moment nuk kishte vepruar, ka nisur përdorimin e gazit lotsjellës dhe ujit, ndërkohë që protestuesit kanë thyer disa tabela sinjalistike.
Më pas, forcat e policisë dhe një makinë uji kanë shoqëruar pjesën e mbetur të protestuesve deri në mbërritjen e tyre në sheshin “Skënderbej”, ku sërish kanë përdorur gazin për të larguar personat që tentuan të thyejnë një kordon të vendosur pranë pemës së Krishtlindjes.
Policia është vendosur në ndjekje protestuesve për t’i shpërndarë deri në largimin e tyre në zonën e Zogut të Zi, ku u pa një prani e madhe e forcave policore./Opinion.al
