Gjysmëfinalja e parë e Ligës së europës, Sevilla-Shakhtar, u përshkua nga një moment dramatik, teksa danezi Krohn-Dehli pësoi një dëmtim të rëndë në minutën e 71-të të ndeshjes ndaj Shakhtar. Sikurse duket edhe në fotot përkatëse, gjuri i tij u bë gropë, doli nga vendi, ndaj u desh dërgimi me urgjencë për në spital. Imazhe të tmerrshme përjetuan të pranishmit në stadium, por edhe ata që e përcollën këtë ballafaqim nga televizori. Krohn-Dehli e la lojën vetëm 13 minuta pasi hyri në fushë. Ai u hodh në ndeshje në minutën e 58-të, duke zëvendësuar Konoplyanka. Në një kthesë të gjurit të majtë, danezi ra përtokë, me simptoma të dukshme të dhimbjes.
Mjekët shpejt e shpejt i erdhën në ndihmë, duke e nxjerrë lojtarin me barrelë nga fusha, me këmbën e tij të majtë të imobilizuar. Sevilla ka njoftuar përmes një deklarate se Krohn-Dehli ka një thyerje (shkëputje) në kupën e gjurit të majtë. Lojtari do t’i nënshtrohet një operacioni, sot në orën 13:30. Ky rast na shërbeu për t’iu rikthyer historisë së momenteve të tilla të frikshme, ku sportistë të ndryshëm, kryesisht futbollistë, kanë parë këmbët e tyre, apo pjesë të tjera të trupit, të thyera e të përkulura, sikur të ishin prej “plasteline”, fytyrën të gjakosur, apo këmbën e kundërshtarit, me takat e ngulura mbi to. Më poshtë, përmes fotove, po paraqesim 22 rastet e dhimshme, në të njëjtën “gjatësi vale” me britmat e Krohn-Dehli mbrëmë
