Viti 2021 erdhi! Njerëzit në Gjermani e pritën Vitin e Ri, por në kohën e pandeisë Corona, shumëçka ishte ndryshe. Festa më e madhe e Vitit të Ri në Gjermani u anulua në Berlin. Aty ku gjithmonë mblidhen me qindra mijëra njerëz dhe festojnë, ishte kryesisht bosh. Nga Porta e Brandenburgut kishte vetëm një transmetim të drejtpërdrejt televiziv me muzikantë të shumtë. Në mesnatë Porta e Brandenburgut u ndriçua me fishekzjarre dhe një shfaqje të vogël dritash.
Policia e Berlinit ishte e përgatitur për ndërhyrje eventuale. Por kishte vetëm disa shkelje sporadike të kufizimeve për shkak të virusit Corona. Në përgjithësi, situata është “shumë e qetë”, tha një zëdhënës i policisë. Herë pas here, dëgjoheshin dhe shihehin festime me fishekzjarre në zonat e ndaluara. Por vetëm kohë pas kohe.
Për shkak të pandemisë Corona në gjithë Gjermaninë kishte kufizime të rrepta. Festimet dhe tubimet publike ishin të ndaluara në Gjermani, por edhe në shumë vende të tjera. Në Paris mbretëronte ndalimqarkullimi. Në vend të festimeve publike, u mbajt një koncert i Jean-Michel Jarre në internet – si avatar me sfond virtual të Katedrales Notre-Dame. Kishte edhe një transmetim të regjistruar me yllin DJ David Guetta përpara muzeut Louvre.
Festimet publike ishin të ndaluara edhe në Itali. Festimet muzikore mund të shikoheshin vetëm në televizion apo internet. Roma ka ndaluar fishekzjarret deri me 6 janar. Në anën tjetër, në Greqi kishte fishekzjarre të mëdha në shumë qytete për të zbavitur njerëzit, të cilëve u ishte ndaluar dalja.
Festat dhe fishekzjarret janë anuluar edhe në shumë vende të tjera të botës, si për shembull në Amsterdam, Londër, New York, Rio de Janeiro apo São Paulo.
Viti i Ri në Rusi është pritur nën hijen e rëndë të shifrave të larta të vdekjeve nga virusi Corona. Në Moskë u mbajt shfaqja tradicionale e fishekzjarreve pranë Kremlinit. Por banorët e Moskës u lutën të mbeten në shtëpi dhe të festojnë me familjen e ngushtë.
Zelanda e Re e ka pritur Vitin e Ri më heret gjatë ditës. Në këtë vend nuk kishte kufizime, pasi që atje me javë të tëra nuk është regjistruar asnjë rast i ri i infektimit me virusin Corona. Turma të mëdha njerëzish janë mbledhu rnë Auckland dhe qytete të tjera.
Fishekzjarre spektakolare kësaj radhe nuk kishte as në Shtëpinë e Operas në Sidnei të Australisë, ku ata që shkelnin masat denoheshin me 620 euro. Sidnei ishte si një qytet fantazmë, thonë dëshmitarët okularë. Në metropolin kinez Wuhan, ku shpërtheu për herë të parë virusi Corona, mijëra njerëz lëshuan balona në qiell.
Festimet dhe pritjet e Vitit të Ri zgjasin sot deri në pra 13.00. Vendi i fundit që feston ndërrimin e motmoteve janë ishujt e pabanuara Baker Island si dhe Howland në oqeanin Paqësor./DW
