Armando Sulejmani, ishte objektivi i atentatit që përfundoi me 2 viktima në qytetin e Vlorës. Siç mëson Opinion.al ai ishte i ulur në sediljen e pasme të automjetit, ku po udhëtonte së bashku me kunatin e tij Orest Rexho dhe shokun Arjan Hasani.
Autorët kanë qëlluar nga një tjetër automjet, me breshëri automatiku dhe plumbat i kanë marrë jetën Orest Rexhos dhe dhe Arjan Hasani. Ndërkohë “Çipuri”, siç njihet ndryshe Armando Sulejmani është plagosur rëndë. Ky i fundit ka qenë anëtar i bandës së Gaxhait, është personazh i njohur i botës së krimit në Vlorë.
Ai i ka shpëtuar një tjetër atentati me armë në vitin 2016, kur mbeti i plagosur lehtë në krah. Në atë kohë, ai u mor në pyetje nga policia dhe deklaroi se nuk i njihte atentatorët, pasi kanë qenë të maskuar.
Armando Selujmani ka dalë nga burgu para disa vitesh pasi ishte dënuar me 25 vite burgim për vrasje. Kohët e fundit, pas atentatit të 2016, Sulejmani pjesën më të madhe të kohës e kalonte në shtëpi, e cila survejohej nga kamera sigurie. Këtë të diel, kishte dalë për një takim dhe po kthehej nga zona e “Ujit të ftohtë” drejt qytetit të Vlorës.
Një prej viktimave u gjet i pajetë brenda një makine të ndaluar, kurse viktima tjetër i shtrirë në rrugë. Ndërkohë, policia ka gjetur në fshatin Babicë një automjet në flakë, që dyshohet se është përdorur nga autorët.
