TIRANE- Helikopteri i ushtrisë EC 145 që u rrëzua në Liqenin e Shkodrës më 6 Prill ku mbeten të vdekur dy pilotë është fotografuar gjatë fluturimeve të tij të fundit nga disa qytetarë. Përkatësisht më datë 1 Prill dhe më datë 4 Prill. Kanë qenë ndjekësit e emisionit “Opinion” ata që kanë dërguar foto dhe video të EC 145 me numër bordi 637 që u rrëzua në mënyrë misterioze mbi liqenin e Shkodrës.
Përmes këtyre fotove ekskluzive shohim se si helikopteri fluturon në një nivel shumë të ulët mbi liqenin e Pogradecit më datë 1 Prill. Pra 5 ditë para se të binte në liqenin e Shkodrës, ky helikopter ishte me të njëjtin mision në Pogradec. Ministria e Mbrojtjes e kontaktuar nga Opinion.al thotë se edhe më datë 1 Prill helikopteri ishte me program stervitor dhe ka patur si rrugëkalim Pogradecin.
Ndërsa në fotot dhe videot e tjera më poshtë shohim EC 145 në paradën që u zhvillua më 4 Prill në sheshin Nënë Tereza. Qytetarët kanë kapur në foto edhe pilotin e ndjerë Donald Hoxha i cili ka pilotuar në shesh me rastin e 7 vjetorit të anëtarësimit të Shqipërisë në NATO.
Mbetet ende mister mënyra se si u rrëzua ky helikopter i ardhur në Shqipëri vetëm 5 muaj më parë. Një helikopter i Forcave të Armatosura shqiptare i blerë nga kompania franko-gjermane Eurocopter. FA ka deklaruar se pilotët kanë qenë të trajnuar dhe nuk është raportuar për avari gjatë fluturimit.
Një kamera e vendosur në helikopter pritet të ndihmojë në zbardhjen e ngjarjes. Materiali i kartës së memories pritet të analizohet në Gjermani. Sakaq dëshmitari i vetëm i mbijetuar, ushtari Gerald Barameta ende nuk ka dhënë ndonjë dëshmi që mund të ndihmonin hetimet. Ndërsa dy pilotët e ushtrisë që mbetën të vdekur Gerald Hoxha dhe Floran Delia janë shpallur Dëshmorë të Atdheut.
/Riviera Dedaj, Opinion.al
