Prej disa ditësh është duke u zhvilluar një masakër mjedisore në Kamëz dhe Bathore. Re të mëdha tymi kanë mbuluar gjithë zonën e banuar.
Qytetarët të shumtë kanë denoncuar në Opinion.al se si po digjen mbetjet urbane fare pranë rrugës kryesore Kamëz-Fushë Krujë. Opinion.al konstatoi vetë djegien e mbeturinave dhe kontaktoi në telefon kryetarin e Bashkisë së Kamzës Xhelal Mziu në përpjekje për të mësuar më shumë rreth asaj që po ndodh në këtë bashki.
Z.Mziu hezitoi të përgjigjej duke thënë se “nuk kam asnjë reagim”. Po kështu as zyra për mediat pranë Bashkisë Kamëz e kontaktuar disa herë nga Opinion.al nuk pranoi të japë asnjë informacion rreth këtij landfilli dhe mënyrës së përpunimit të mbetjeve urbane.
Nevoja për të ndalur këtë masakër mjedisore është emergjente. Tymi i shkaktuar nga djegia e mbeturinave në një vend të mbipopulluar rrezikon seriozisht jetën e këtyre banorëve. Fotot dhe videot bashkëngjitur këtij lajmi tregojnë qartë se si landfilli i mbeturinave të Kamzës është vendosur buzë rrugës nacionale dhe pranë shtëpive private. /R.D.-Opinion.al
