Gazetari investigativ, Artan Hoxha është shoqëruar mbrëmë në Prokurorinë e Krimeve të Rënda porsa ka dalë nga emisioni “Opinion”. Tre oficerë të policisë gjyqësore të Shkallës së Parë të Krimeve të Rënda mbërritën në oborrin e tv Klan mbrëmjen e së enjtes, rreth orës 23:30. Ata i kanë kërkuar Hoxhës të shkonte me ta në prokurori për tu marrë në pyetje. Shoqërimi i Hoxhës u bë pasi, prokurorët pretendojnë se ka nxjerrë sekrete hetimore gjatë emisionit “Opinion”. Gazetari foli në emision për dëshminë që ka dhënë piloti italian që ra dje në Ishëm të Durrësit, por edhe për vrasjen e informatorit të tij në Korçë. Gazetari është shoqëruar për faktin se informoi publikun se piloti Guido Guidi kishte fluturuar për të parë pistën, ku do të vinte më pas për të marrë ngarkesën e drogës.
Gazetari Hoxha është mbajtur në Prokurorinë e Krimeve të Rënda deri në orën 02:50 të ditës së sotme (rreth 3 orë e gjysëm). Pas daljes nga prokuroria ai ka deklaruar se i janë sekuestruar telefonat celularë dhe kartat SIM. Hoxha tregoi para kamerave edhe procesverbalin që fakton sekuestrimin për qëllimeve hetimore. /Opinion.al
