Ketiona Ibrahimi, 18 vjeçe ka ndërruar jetë pas një ndërhyrje kirurgjikale në spitalin e Elbasanit. Familjarët kanë akuzuar kirurgen për mjekim të pakujdesshëm, ndaj kanë nisur hetimet për zbardhjen e ngjarjes. Policia tha se ka nisur hetimet për mjeken me iniciale J.K, 43 vjeçe, e cila ka kryer ndërhyrjen kirurgjikale më datë 8 korrik tek pacientja me iniciale K.I nga Gramshi.
Nga të dhënat e para të familjarëve në polici mësohet se ëfillimisht vajza është paraqitur në spital me dhimbje barku, ç’ka ka bërë që mjekët të dyshojnë për probleme gjinekologjike.
Pas kryerjes së ekos, mjekët kanë pikasur ujëra të tepërta në trupin e vajzës, duke bërë që të nisin menjëherë ndërhyrjen, prej nga ka rezultuar se pankreasi dhe mëlçia e 18-vjeçares kanë qenë në gjendje të degraduar.
Në këtë mënyrë, dyshimet janë se vajza ka pasur diagnozën e leucemisë akute. Sipas burimeve nga spitali, e reja është operuar në orën 12.30 të datës 8 korrik, ndërsa ka ndërruar jetë në orën 20.00 të po asaj dite.
Sipas kallëzimeve të familjarëve dyshohet se 18 vjeçarja ka humbur jetën si pasojë e mjekimit të pakujdesshëm.
Opinion.al u interesua për më shumë informacion pranë Ministrisë së Shëndetësisë, por ky dikaster tha se “në momentin që do kemi përgjigjen e mjekësise ligjore do japim raport për ngjarjen”.
Njoftimi i Policisë
Elbasan Specialistët për Krimet, në Komisariatin e Policisë Elbasan referuan materialet në Prokurori për proçedim penal në gjendje të lirë për veprën penale “Mjekimi i pakujdesshëm” në ngarkim të shtetases J.K., 43 vjeçe, banuese në Elbasan. Ajo duke qenë me profesion mjeke kirurge në spitalin e Elbasanit, në datë 8 korrik 2017, kreu një ndërhyrje kirurgjikale tek pacientja K.I..
Pacientja K.I, ndërroi jetë pak pas operacionit.
Sipas kallëzimeve të familjarëve dyshohet se 18 vjeçarja ka humbur jetën si pasojë e mjekimit të pakujdesshëm.
Grupi hetimor po kryen veprime të mëtejshme në bashkëpunim me ekspertët mjeko–ligjorë për përcaktimin e shkakut të vdekjes.
Materialet i kaluan Prokurorisë së Rrethit Gjyqësor Elbasan për veprën penale “Mjekimi i pakujdesshëm” parashikuar nga neni 96 i Kodit Penal. /Opinion.al
*Foto e të ndjerës marrë nga rrjetet sociale
