Një futbollist në provincën e Tetes në Mozambik ka vdekur pas një sulmi të papritur të krokodilit, derisa ishte duke stërvitur pranë lumit.
Futbollisti i ri, i quajtur Estevao Alberto Gino, ishte pjesë e klubit Atletico Mineiro de Tete.
Sipas Edy Carvalho, themelues i klubit, si dhe trajner, 19 vjeçari ishte duke vrapuar përgjatë lumit para se të ndalej për t’u qetësuar, ndërkohë që u sulmua nga kafsha e rrezikshme.
“Atë natë ai ishte duke pushuar dhe i kishte futur duart në ujë për t’u freskuar. Më pas, krokodili ka dalë nga uji papritur dhe e ka kapur për beli. Pas kësaj, kafsha është kthyer në ujë së bashku me viktimën”, ka thënë Carvalho për mediat lokale.
Ai po ashtu ka zbuluar se tragjikisht, trupi i lojtarit të ri nuk është gjetur dhe ka gjasa se është ngrënë nga zvarraniku i uritur.
Raportohet se Gino ishte duke vrapuar me dy shokë, të cilët kanë thënë se nuk kanë mundur të bënin asgjë që ta shpëtonin shokun e tyre, pasi kanë njoftuar se “përbindëshi” ishte rreth 5 metra i gjatë.
“Ne jemi të pikëlluar për lojtarin, vëllain, shokun dhe djalin tonë, për qendërmbrojtësin tonë të dashur, Estevao Alberti Gino”, ka shkruar klubi Atletico Mineiro de Tete në “Facebook”.
“Ai ishte vetëm 19 vjeç me një të ardhme premtuese. Ishte viktimë e një krokodili në brigjet e lumit Zambezi”, ka shtuar klubi afrikan.
Ky klub e ka përshkruar Ginon si një shembull të bindjes, respektit dhe përulësisë, duke e ngushëlluar po ashtu edhe familjen e tij për këtë rast tragjik.
Sulmet nga krokodilët janë shtuar kohëve të fundit në lumin Zambezi. Zëdhënësi i policisë lokale, Leonel Muchina e ka konfirmuar incidentin, duke shtuar se trupi i pajetë i viktimës nuk është gjetur ende. /Zëri
