Kryeministri Edi Rama duket se ka qenë në humor në takimin e organizuar për miratimin e reformës në drejtësi në Pallatin e Brigadave.
Fillimisht e nisi me përfaqësuesin e komisionit të Venecias, Gianni Buquicchio.
“I dashur Gianni, t’i duhet ta mësosh sot se fjala Venecia është përdorur në Shqipërinë e gjashtë muajve të fundit, më shumë se ç’është përdorur nga të gjitha agjencitë turistike të botës, të marra sëbashku. Ne, deputetëve shqiptarë, na kanë munguar vetëm gondolat në sallën e Kuvendit, për t’u ndjerë gjatë çdo sesioni si një grup turistik në zemër të ujërave të Venecias”, tha Rama gjatë fjalimit të tij./360gradë.al
Më pas “viktimë” e humorit ra edhe deputetja socialiste Vasilika Hysi.
Në momentin kur Vasilika Hysi vlerësoi rolin e ekspertëve të OPDAT dhe EURALIUS për reformën në drejtësi, ndërhyri Rama, duke kërkuar të shtonte diçka.
Duke qeshur Rama tha: “Në mbledhje grupi Vasilika vinte si përgjumësh. Kur i thosha, ‘Vasilikë çfarë ke?’ Më shkatërruan më thoshte Johni dhe Rayner gjithë natën”.
Të qeshurat nuk munguan, natyrisht nga vetë Rama më shumë. Deputetja, e cila nuk u kuptua në e kuptoi apo jo “shakanë plot kripë”, vazhdoi me momentin “ceremonial”. “Kemi përfituar shumë nga këmbëngulja e Jon dhe qetësia e Rainer” u shpreh ajo.
Rama është fotografuar edhe duke i treguar diçka edhe kryetarit të grupit parlamentar të LSI-së, Petrit Vasilit.
Ky i fundit nuk e ka mbajtur dot të qeshurën nga ajo që i tregonte Rama.
Siç duket, përveç Vasilika Hysit, ndonjë personazh tjetër do të ketë rënë “pre” e batutave të Ramës.
