Mbetet kritike situata e zjarrit në Krastë të Elbasanit, i cili vazhdon prej më shumë se 24 orësh.
Qindra persona po përballen me flakët, ndërsa Elbasani është zgjuar i mbuluar me re të mëdha tymi nga ajo që cilësohej mushkëria e qytetit.
Zjarrifikëset e Elbasanit, Librazhdit, Peqinit, Gramshit, Lushnjes, forcat e ushtrisë, punonjës të Bashkisë së Elbasanit dhe kompani private luftojnë me flakët prej 24 orësh.
“Kemi 24 orë që luftojmë me zjarrin. Janë djegur rreth 100 hektarë sipërfaqe, por më e rëndësishme është se zjarri është sipërfaqësor dhe janë djegur shkurret dhe bimësia e ulët”, ka deklaruar Klevis Xhoxhi, nënkryetar i Bashkisë së Elbasanit.
Zjarri ka shpërthyer në anën lindore të kodrës dhe ka përparuar me shpejtësi drejt majës.
Krasta është parku më i madh shplodhës për qytetin, i njohur ndryshe si mushkëria e Elbasanit.
