Trajneri i Interit, Luciano Spalletti është fotografuar duke bërë me duar simbolin e shqiponjës në mes të disa tifozëve shqiptarë. Fotoja është shkrepur në Milano, pas ndeshjes Inter-Juventus të përfunduar me rezultatin 1-1.
Megjithëse këto janë javë të tensionuara për teknikun e Interit, i cili duhet të sigurojë pjesëmarrjen në Champions League, duket se ka gjetur kohë të argëtohet edhe me tifozët shqiptarë. Vetëm pak ditë më parë, Spalletti tha se në përfundim të sezonit do të bënte publik emrat e lojtarëve që ishin sjellë korrekt dhe të atyre që kishin shkaktuar probleme, duke konfirmuar atmosferën e rënduar në kampin zikaltër.
Pak kohë më parë, ishte zëvendëskryeministri dhe Ministri i Brendshëm italian Matteo Salvini i cili bëri simbolin e shqiponjës, përkrah disa emigrantëve shqiptarë./Opinion.al
