Mërgim Mavraj është ndër të parët futbollist që kanë reaguar në mënyrë personale për ndeshjen kundër Izraelit.
Në një postim të pak minutave më parë, mbrojtësi i Kombëtares ka folur për ndeshjen e të shtunës duke ngritur pyetjen se pse kundërshtarët tanë abuzojnë me mikpritjen e shqiptarëve.
Ai madje ka kujtuar ndeshjen e Shqipërisë kundër Serbisë dhe rrezikun që futbollistët hasën në fushën e lojës në Beograd.
Mavraj e ka mbyllur shkrimin e tij duke kërkuar që tifozët e kombëtares, të paktën në ndeshjet në “shtëpi” ta shijojnë ashtu siç duhet sportin.
Ky është shkrimi i plotë i Mavraj:
“Sa e sa marrëzi, sa e sa poshtërsi janë bërë në dëm të së gjorës Shqipëri! Por a duhet thënë STOP? A duhet të abuzojnë të tjerët me mikpritjen tonë?
Një vend nuk e bën të madh numri i banorëve, por karakteri, zemra, dëshira e krenaria e atij popullit!
Ne kemi tradita, e këtë e tregon qartë historia e kombit tonë! Ne nuk duhet ti hedhim asnjëherë poshtë njerëzit tanë, tifozët tanë, gjakun tonë vetëm se “siguria” e tjetrit është në “rrezik”!
A kishte rrezik më të madhe ndaj nesh në Serbi?! A kishte poshtërim më të madh se përçarja e frika që futën tek tifozët tanë dy ditë më parë kundërshtarët?! Nuk besoj se ka ndonjë qe mendon se shkaktar i atij “boshlliku” që u krijua në stadium ishte shiu, por paniku i hapur kot së koti.
Futbolli duhet të japë mesazh paqeje, e jo të krijojë panik, stres e përçarje. Unë nuk e ndjej veten aspak mirë kur krijohen situata të tilla! Tifozët tanë e duan këtë vend, e duan këtë kombëtare e ndaj duhet ta shijojnë siç duhet, të paktën në shtëpinë e tyre! Tjerët, le ta “gjejnë” të keqen diku tjetër, jo tek Shqiptarët!”
