Me rastin e 554-vjetorit të vdekjes së Gjergj Kastriot Skënderbeut, presidenti Ilir Meta ka vendosur kurora më lule në memorialin e Heroit Kombëtar në Lezhë.
Ndërsa kryeministri Edi Rama dhe presidenti turk Recep Tayyip Erdoğan ndodhen në Laç, kreu i shtetit ka zgjedhur të japë një mesazh dhe lartësoi figurën e Gjergj Kastriotit, si simbol i identitetit kombëtar.
Meta në fjalën e tij është shprehur se heroi kombëtar është frymëzim për çdo rilindje dhe nismën e vendi tonë për të ecur drejt Evropës.
“Sot është dita e kalimit në përjetësi e kryeheroit tonë kombëtar, Gjergj Kastriot Skënderbeut, që me shumë të drejtë Fan Noli do e cilësonte shqiptari më i gjallë për gjithë shqiptarët përgjithmonë. Është jo vetëm kryeheroi kombëtar, që i dha identitetin më të fortë kombit tonë, në mbrojtje të lirisë dhe të dinjitetit kombëtar dhe njerëzor, por edhe është ky personalitet i jashtëzakonshëm dhe një hero i qytetërimit evropian. Ai përcaktoi në mënyrë të pakthyeshme identitetin evropian të popullit tonë. Kjo figurë kaq e madhe, që edhe shekuj më pas shërbeu si frymëzim kryesor i rilindjes sonë kombëtare për të ngritur popullin shqiptar në luftën për liri, shtet formim dhe pavarësi. Është pikërisht Gjergj Kastriot Skënderbeu që me veprën e tij do të frymëzojë shqiptarët për veprat e tij dhe dinjitet kombëtar dhe njerëzor”,-tha Meta.
