Kryeministri Edi Rama është betuar në Presidencë si ministër i Jashtëm.
Pas dekretit të Presidentit, të hënën Rama mori edhe votat e 78 deputetëve të mazhorancës, duke u bërë zyrtarisht ministër i Jashtëm.
Këtë detyrë Rama e mori pas largimit të Ditmir Bushatit dhe mosdekretimit të Gent Cakajt, i cili u refuzua nga Presidenti Ilir Meta.
“Pas ekzekutimit të himnit kombëtar dhe leximit të dekretit përkatës, Ministri për Evropën dhe Punët e Jashtme, e njëkohësisht Kryeministër, Z. Edi Rama, u betua sonte, duke vendosur dorën mbi Kushtetutën e Shqipërisë”, thuhet në njoftimin e Presidencës.
Rama do të mbajë detyrën e Kryeministrit dhe të ministrit të Jashtëm deri në krijimin e Gjykatës Kushtetuese, e cila do të vendos më pas emerimin ose jo të Cakajt në krye të Ministrisë së Jashtme.
G.Z
