Qindra qytetarë kanë pritur presidentin e Kosovës, Hashim Thaçi në pikën kufitare të Morinës pasi ai u kthye nga Haga.
Thaçi mbërriti sot në aeroportin Nënë Tereza në Tiranë, pasi u kthye nga intervistimi 4 ditor në Prokurorinë e Posaçme në Hagë, që trajton pretendimet për krime të luftës dhe të pas luftës në Kosovë.
Ai u nis menjëherë drejt Kosovës dhe ka zgjedhur Morinën si pikën ku do të kalojë kufirin.
Me flamuj të Shqipërisë dhe UÇK-së, këngë e valle, qindra qytetarë janë mbledhur për t’i bërë një pritje heroike presidentit Thaçi.
Ai tha se nesër do të ketë një prononcim lidhur me katër ditët që u mor në pyetje.
Prokuroria e Posaçme më 24 qershor publikoi njoftimin për ngritjen e akuzave ende të pakonfirmuara ndaj tij dhe kryetarit të Partisë Demokratike, Kadri Veseli, si të dyshuar për krime kundër njerëzimit dhe krime lufte.
Ai i ka mohuar akuzat, ndërsa ka theksuar se është i gatshëm të përballet me atë që ai e quajti sfidë të re dhe se sipas tij askush nuk mund ta rishkruajë historinë Kosovës.
Akuzat e Prokurorisë së Posaçme i janë dorëzuar një gjykatësi të procedurës paraprake i cili duhet të vendosë për konfirmimin apo hedhjen poshtë të tyre.
Gjykata e Posaçme për Kosovën e njohur me emrin Dhomat e Specializuara u themelua më 2015 dhe vepron në bazë të ligjeve të Kosovës por me personel ndërkombëtar.
Pretendimet për krime lufte kundër pjesëtarëve të ish Ushtrisë Çlirimtare të Kosovës dolën në raportin e vitit 2011 të hartuar nga i dërguari i Këshillit të Evropës, Dick Martty, i cili ngriti dyshimet për përfshirjen e ish kryengritësve në vrasjen e civilëve serbë dhe kundërshtarëve politik shqiptarë. /Opinion.al
