Disa ditë më parë një kamion i mbushur me hashash kaloi në pikën doganore të Kakavijës por u kap nga pala greke. Shoferi arriti të arratisej dhe ti shpëtonte policisë. Tashmë ka dalë edhe shifra zyrtare e peshës së drogës së kapur. Bëhet fjalë për më shumë se 1 ton kanabis.
Në njoftimin e policisë greke thuhet se “më 16.02.2017, ora 20:20 një maune me targa shqiptare me leje ndërkombëtare qarkullimi dhe drejtues një shtetas shqiptar, tentoi të kalonte kufirin greko-shqiptar, me destinacion Greqinë. Gjatë ushtrimit të kontrollit doganor u gjetën të ambalazhuara dhe të fshehura me kujdes në një vend të posaçëm në pjesën e parë të karrocerisë, 700 dengje me peshë të përgjithshme 1 ton e 148 kg lëndë narkotike, sipas gjasave kanabis i papërpunuar. Lënda narkotike dhe automjeti u sekuestruan, ndërsa drejtuesi i mjetit iu shmang arrestimit. Është hartuar dosje penale dhe i është dhënë për ndjekje prokurorisë së Janinës”.
