Trafiku në qendër të Tiranës pasditen e të enjtes është bllokuar më shumë se 20 minuta, duke krijuar kaos dhe vonesa tek banorët e kryeqytetit.
Kjo gjëndje e rënduar në rrugë ka ardhur për shkak të një aktiviteti të organizuar nga Partia Socialiste në qendër të Tiranës me të rinjtë që votojnë për herë të parë në zgjedhjet e qershorit, 2017.
Shtoi gjithë kësaj edhe bllokimin e sheshit “Skënderbej” nga punimet e Bashkisë dhe bulevardit para Kryeministrisë për shkak të protestës së opozitës me çadër, pothuajse e ka bllokuar fare kalimin në qendër, duke krijuar stres dhe vonesa për qytetarët.
Paradoksale është edhe fakti se asnjë njoftim zyrtar nuk është bërë nga policia rrugore për bllokimin, ndërsa qytetarët janë përballur me këtë situatë krejt papritur, duke mbetur për minuta të tëra të paralizuar në rrugë.
