Personi që shihet në këtë foto është 52-vjeçari Xherxh (Gjergj) Laçi, i cili u arrestua ditën e sotme nga policia e Tiranës pasi mbante të ngujuar në banesë dhe dhunonte sistematikisht prej 6 vitesh, dy fëmijët e tij dhe bashkëshorten.
Pas denoncimit të njërit prej të afërmve të gruas, policia ka ndërhyrë duke vënë në pranga kryefamiljarin, i cili për arsye radikale nuk lejonte djemtë as të frekuentonin shkollën.
Familja jetonte në kushte të vështira ekonomike, pa energji elektrike pasi ishte shkëputur për shkak të mospagimit të faturave. Dy djemtë përkatësisht 15 dhe 17 vjeç, pas përfundimit të shkollës 9-vjeçare nuk ishin lejuar nga babai i tyre të vazhdonin gjimnazin, ndërsa bashkë me nënën dhunoheshin dhe kërcënoheshin prej tij. Laçi gjithashtu e kishte izoluar ballkonin me çarçafë, për të shmangur çdo kontakt të familjes me botën e jashtme.
“Ju nuk mund të dilni jashtë se mund të infektoheni”, kanë qenë fjalët e 52-vjeçarit drejtuar gruas dhe dy djemve, të cilët i ka kërcënuar me jetë me armë të ftohta dhe nën terror psikologjik.
Sipas informacioneve paraprake, 52-vjeçari dilte nga banesa vetëm ditën e premte për t’u falur në xhami, ndërsa në banesë në rrugën “5 Maji” në momentin e arrestimit janë gjetur edhe libra fetarë.
Pas operacionit të zhvilluar, në banesë janë gjetur dy thika, litarë dhe fishekë të cilët i kishte groposur në oborrin e shtëpisë. Laçi ka qenë i dënuar edhe më parë për armëmbajtje pa leje. Në 2013-ën Laçi ka qëlluar me breshëri automatiku në zonën e 5 Majit.
Policia bëri me dije se 52-vjeçari ka qenë i dënuar më parë për armëmbajtje pa leje.
Gruaja dhe dy fëmijët janë dërguar në një qendër rehabilitimi, ku do të marrin edhe trajtim psikologjik. Ndërkohë, 50-vjeçari do t’i nënshtrohet një kontrolli mjekësor për të verifikuar nëse ka apo jo probleme të shëndetit mendor./Opinion.al
