Në 11 prill të 2017, Agim Arapi, 51 vjeç humbi jetën pasi u rrah barbarisht. Konflikti nisi për një tub aspirimi. Konstandin dhe Kujtim Ekonomi i detyroheshin viktimës një shumë prej 13 mijë lekësh të reja.
51-vjeçari i kishte kërkuar Jurgen Kurtit paratë dhe në debat e sipër, kanë ardhur dhe janë përfshirë në konflikt edhe dy vëllezërit Konstandin dhe Kujtim Ekonomi.
Këto dy të fundit e kanë futur viktimën, Agim Arapi brenda në dyqanin ushqimor dhe kanë mbyllur qepenin, ku aty më pas e kanë goditur me grushta. Gjatë kësaj kohe Jurgen Kurti ka qenë jashtë dyqanit ushqimor, qepeni ishte i mbyllur dhe brenda ndodheshin viktima dhe autorët.
Gjatë këqyrjes së vendit të ngjarjes u gjet dhe sekuestrua në cilësinë e provës materiale një thikë. Nga ekspertiza mjeko- ligjore u vërtetua se Agim Arapi ka ndërruar jetë për shkak të problemeve që ka pasur me zemrën, ku nuk ka përballuar dot goditjet me grushte, të kryera nga autorët.
Në 4 prill të 2016 Artur Kurti, i ati i Jurgen Kurtit u vra në banesë. 5 muaj më vonë Prokuroria e Krimeve të Rënda shpalli moskompetencën për krimin që tronditi Tiranën.
Vrasja e Artur Kurtit, në referim të ekspertizës dhe provave të mbledhura nuk është kryer me dashje, e për këtë, prokurorët e Krimeve të Rënda deklaruan se nuk mund të hetohet si krim i rëndë në familje.
Në atë kohë, Jurgen Kurti, 23 vjeç, i arrestuar së bashku me dajën, Leonard Ristani, u la i lirë nga Krimet e Rënda gjatë vlerësimit të masës së sigurisë. Krimi u mor përsipër nga Ristani, i cili përshkroi rrethanat e sulmit nga viktima, i cili sipas asaj që tregohet, sapo ka hyrë në banesë me një thikë në dorë ka qëlluar mbi të dyshuarit./Opinion.al
