Për mbi një orë Ministri Energjetikës Damian Gjiknuri ka dëshmuar në dhomën penale të Tiranës në procesin ndaj Kastriot Ismailajt ish-administratorit të kompanisë DIA nën akuzë për mashtrim.
Gjiknuri i është përgjigjur disa prej pyetjeve të bëra nga Ismailaj, teksa deklaroi para togave të zeza se ishte Rebeca Gaskin ajo që i kërkoi shtetit shqiptar dhe atij të mbyllnin mosmarrëveshjet me mirëkuptim për ti dhënë fund konfliktit në arbitrazh.
“Rebeka Gaskin e kam takuar dy herë dhe në vitin 2014 ajo kërkoi që të gjenim zgjidhje me mirëkuptim pasi kishte mësuar nga media për mashtrimet e Ismailajt. Në rolin e administratores dhe drejtores së DIA-s, Rebeca ofroi marrëveshjen, ne e nënshkruam dhe gjithçka u mbyll me mirëkuptim”, u shpreh Gjiknuri.
Ndërkohë pas kafazit të hekurt, Kastriot Ismailaj e akuzoi Gjiknurin se ka shkelur ligjin duke paguar për të dhënë deklarime të rreme Romeo Kara dhe me të ka udhëtuar dhe drejt Vienës për të bërë dakordësinë kundra Ismailajt.
Në seancën e kësaj të enjte nuk munguan dhe dy detaje gjatë dëshmisë së Gjiknurit ku fillimisht ai u paraqit pa kartë identiteti dhe në një tjetër moment i kërkoi gjykatës disa minuta pushim për të shuar etjen me ujë. /Opinion.al
