Nuk dihet se sa janë, por në disa pamje të publikuara në mediat italiane, trupat e shqiptarëve që kanë humbur jetën nga koronavirusi në Itali po kthehen në Shqipëri.
“Coronavirus, udhëtimi i fundit drejt shtëpisë”, kështu i kanë përshkruar fotot mediat fqinje.
Fotot janë bërë në portin e Barit nga Francesco Saccente dy ditë më parë raporton “Antenna Sud”. Aty shihen 4 makina mortore të cilat presin të futen në tragetin që do të nisët për në Portin e Durrësit.
“Këtu në Itali kishin gjetur punë, kishin realizuar një ëndërr. Sonte nga porti i Barit pamjet dramatike të makinave funerale me shtetas shqiptarë viktima të pandemisë. Ata do të ngjiten në tragetin Marina drejt Durrësit për lamtumirën e fundit” shkruan “Antenna Sud”.
Pamjet janë të trishta ashtu si dhe bilanci tragjik që ka shkaktuar kjo pandemi. /Opinion.al
