Kryetari i bashkisë së Durrësit, Vangjush Dako i cili është vënë në shënjestër të akuzave të PD-së pas lajmit se ka ndikuar në lirimin e Lul Berishës, është parë sot në mesditë, teksa bënte një shëtitje dhe pinte kafe me kreun e OSHEE-së Adrian Çela në zonën e Bllokut.
Çela ka qenë më parë n/kryetar i Bashkisë së Durrësit, dhe njihen si miq të vjetër me Dakon. Nuk dihet nëse kryebashkiaku kishte mundësi të takonte edhe Ramën sot, pasi ky i fundit ndodhej paradite në Konispol për të shpërndarë tapi.
Vangjush Dako po hetohet nga prokuroria për shkelje administrative. Organi i akuzës tha dje se nisi hetimet kryesisht për bashkinë dhe gjykatën, pas presionit të madh në media për lirimin e Lul Berishës nga Gjykata e Apelit të Durrësit. Prokuroria ka dyshime se ka abuzime në këtë vendim gjykate. Ndërsa Dako hetohet në se ka lëshuar në mënyrë të ligjshme kërkesën për ta punësuar Lul Berishën në Bashkinë e Durrësit.
