Opinion.al ka siguruar foton e 25-vjeçarit Klodjan Rasha i cili u ekzekutua nga një efektiv policie pak pas mesnate në Tiranë.
Ngjarja ka ndodhur në rrugën “Dritan Hoxha”, ku sipas njoftimit të Policisë i riu nuk i është bindur urdhrit për të ndaluar, por është larguar me vrap duke i drejtuar punonjësit të policisë një send të fortë në dukje armë zjarri. Kjo ka bërë që efektivi të reagojë duke e ka plagosur me armën e shërbimit dhe më pas i riu ka ndërruar jetë në spital.
Mësohet se autoritetet kanë gjetur në vendin e ngjarjes një armë zjarri e cila dyshohet se i përketë viktimës, por në bëhet e ditur nëse 25-vjeçari ka qëlluar në drejtim të efektivit. Kjo gjë hedh dyshime në lidhje me të drejtën e përdorimit të armës nga ana e efektivit që qëlloi të riun për vdekje.
I riu me origjinë nga Puka është qëlluar për vdekje vetëm pak metra larg banesë së tij. Aktualisht punonjësi i policisë me iniciale N.H., është shoqëruar në ambientet e Drejtorisë Vendore të Policisë Tiranë.
25 vjeçari rezulton të jetë një person me precedentë të mëparshëm penalë. Ai është dënuar për plagosje të lehtë me dashje dhe për heqje të paligjshme të lirisë në vitin 2016./ Opinion.al
