Arma në foto është snajperi i përdorur për të vrarë Kastriot Reçin paraditen e së martës në qytetin e Rrëshenit.
Një plumb i vetëm i mjaftoi autorit për ta çuar në fund ekzekutimin e 47-vjeçarit i cili u godit në zemër.
Arma është tepër e sofistikuar dhe kjo tregon për rëndësinë që i kanë kushtuar porositësit vrasjes. Sikurse shihet në foto, arma është e pajisur edhe me silenciator dhe dylbi. Në fakt është një pushkë e çmontueshme e përbërë nga dy pjesë. Snajperi është i një kalibri të lartë, dhe sipas ekspertëve kriminalistë, qitësi ka qenë profesionist.
Çmimi i tyre fillon nga 10 mijë dollarë në varësi të pajisjeve që i shtohen.
Qitja është kryer nga një pallat 9-katësh në Rreshen, në një distancë prej 200 metrash me lokalin e Reçit.
Gazetari investigativ Artan Hoxha, duke komentuar ngjarjen tha: “Mënyra e realizimit të vrasjes më tremb, ngjarja ka ndodhur ditën në një qytet të vogël. Mënyra se si është realizuar tregon se nuk është vrasës i rëndomtë. Është saktësi kirurgjikale, ka pasur shumë njerëz, mund të shkaktonte dëmë të tjera nëse autori do të kishte zgjedhur armën tradicionale në Shqipëri, kallashnikovin. Vetëm fakti që ky lloj vrasësi është i lirë përbën rrezik. Edhe Forcat Speciale po ta marrin për sipër atë lloj goditje nuk e dimë nëse do ta reazlizojnë me përpikmëri”. /Opinion.al
