Demir Hyseni 49 vjeç është shqiptari që mbeti i vrarë sot në Terni të Italisë. Ai banonte në rrugën Galvani dhe si çdo mëngjes kishte dalë nga shtëpia me vajzën dhe gruan. Dëshmitarët i kanë thënë policisë italiane se sapo hipi në makinën e tij, Volkswagen Touran u afrua një person dhe pas një debati të shkurtër mes tyre agresori shtiu me armë ndaj 49 vjeçarit.
Autori, sipas dëshmitarëve, ishte një burrë i bëshëm në trup, i veshur me një bluzë blu e flokë të zeza. Ai nxori një pistoletë gjysmë automatike, kalibri 7.65 dhe qëlloi mbi shqiptarin disa herë. Autori është larguar me shpejtësi, ndërsa arma e krimit u gjet në koshin e mbeturinave.
Skenën e rëndë e kanë parë edhe familjarët e tij, bashkëshortja dhe vajza. Karabinierët e Terni -t kanë nisur hetimet për identifikimin e autorit që dyshohet të jetë shqiptar. Motivet e ngjarjes janë ende të panjohura, po hetohet ose larje hesapesh ose vrasje për motive sentimentale. Mediat italiane theksojnë se një gjë është e sigurt: Viktima dhe autori njiheshin me njëri – tjetrin.
Demir Hyseni 49 vjeç jetonte prej vitesh në Itali dhe punonte në një fabrikë.
*foto dhe video nga vendi i ngjarjes
