Policia në Eseks ka arrestuar një 25-vjeçar i cili dyshohet të jetë shoferi i kamionit ku u gjetën 39 persona të vdekur ditën e sotme.
Ngjarja e rëndë tronditi sot rajonin jug-lindor të Anglisë, ku në rimorkion e një kamioni u gjendën 39 trupa të pajetë emigrantësh.
Për këtë ngjarje policia ka arrestuar me akuzën e vrasjes, Mo Robinson, 25 vjeç, nga Irlanda e Veriut, i cili dyshohet se ka futur kamionin në Mbretërinë e Bashkuar nëpërmjet portit të Holihedit, në veri të Uellsit.
Automjeti është verifikuar se është nisur nga Bullgaria dhe të 39 viktimat, një prej të cilëve është i mitur, dyshohet se kanë qenë emigrantë që përpiqeshin të futeshin ilegalisht në Mbretërinë e Bashkuar.
Rimorkio e kamionit është me sistem frigoriferik kështu që një nga pistat ku po heton policia është se personat mund të kenë vdekur nga i ftohti dhe asfiksia. /Opinion.al
