Aktualitet

Foto/ I jepet lamtumira aktorit Xhevdet Ferri


               Publikuar në : 16:32 - 17/01/20 |
xhu lia

Ditën e sotme u përcoll për në banesën e fundit aktori i madh i kinematografisë shqiptare Xhevdet Ferri. I përcjellë me lotësh nga familjarë, miq ,kolegë dhe dashamirës, Ferrit iu dha lamtumira e fundit rreth orës 13:00 në varrezat e Sharrës.

Mes emrash të njohur të pranishëm në këtë përcjellje që kanë punuar dhe e kanë shoqëruar aktorin e njohur dhe shumë të dashur për publikun në rrugëtimin e tij  artistik,  ishin aktorët Ndriçim Xhepa, Petrit Malaj, Rajmonda Bulku etj.

Amaneti i aktorit të njohur  kishte qenë të mos përcillet me ceremoni shtetërore. Ferri ndërroi jetë në moshën 59-vjeçare si pasojë e një sëmundje të rëndë e cila e mundonte prej kohësh. Aktor i shumë roleve i spikatur veçanërisht në kinema ai do të kujtohet përjetësisht për punën dhe kontributin e tij në art.

Ndër filmat më të njohur të tij ishin “Dhe vjen një ditë”, “Vitet e pritjes”, “Gjoleka djali i Abazit”, “Hije që mbeten pas” ,”Përrallë nga e kaluara” etj.

Nga viti 1995 deri në 1999 ai ka mbajtur postin e drejtorit të Qendrës Kombëtare të Kinematografisë. Rikthehet në këtë detyrë në vitin 2006.

Në vitet 1999-2001, ai drejtoi Teatrin Kombëtar. Xhevdet Ferri, lindi në Durrës, më 26 nëntor 1960. Ai ishte bashkëshorti i aktores Rozeta Ferri me të cilën ka dhe një vajzë. Kohët e fundit aktori i ndjerë ishte bërë gjysh për herë të parë./Opinion.al/

Pas