Kjo është gjithçka ka mbetur nga makina tip Volksvagen Passat me të cilën udhëtonin tre viktimat e atentatit të Fushë Krujës.
Autoritetet kanë gjetur të paktën 60 gëzhoja plumbash në vendngjarje, ndërsa ende nuk dihet me siguri nëse kanë arritur të sigurojnë prova materiale në mjetin e shkrumbuar.
Dyshimet e para bënin të besohej se makina ishte ndezur pasi mbajtësi i karburantit ishte qëlluar me armë, por tashmë janë shtuar dyshimet që autorët i kanë vënë flakën makinës pasi kanë kryer vrasjen me armë.
Trupat e Brilant Martinaj dhe Besmir Hoxha janë shkrumbuar brenda mjetit, ndërkohë që Diklen Vata ka mbetur i pajetë buzë rrugës, shumë pranë automjetit.
Trupat e pajetë janë dërguar tashmë në institucionin e mjekësisë ligjore, ndërsa grupi hetimor ka mbledhur provat nga vendngjarja.
Ndërkohë, në fshatin Larushk pak minuta pas atentatit u gjet një automjet i djegur me tre armë zjarri brenda tij, çka bën të dyshohet se është përdorur nga autorët gjatë atentatit.
Ftakeqësisht zona ku ka ndodhur krimi është e pasurvejuar me kamera, çka duket se do ta bëjë edhe më të vështirë zbardhjen e këtij krimi./Opinion.al
