Vija kufitare mes Greqisë dhe Turqisë ka marrë pamjen e një fronti lufte, që dominohet nga zjarri, tymi, gurat dhe gazi lotsjellës, për shkak të dyndjeve të refugjatëve që duan të futen në Evropë.
Emigrantët nga Lindja e Mesme dhe Afrika i vunë flakën gardheve rrethuese ndërsa forcat greke janë përpjekur t’i zmbrapsin ata dhe të ruajnë kufirin e tyre. Vetëm ditën e kaluar, autoritetet fqinje bënë me dije se kishin ndaluar kalimin e 24 mijë personave.
Në këtë valë të re refugjatësh lufte, Greqia, e cila ka qenë rruga kryesore për qindra mijëra migrantë që dëshironin të arrinin në vendet evropiane, e ka quajtur situatën kërcënim të sigurisë kombëtare.
Nga ana tjetër, Bashkimi Evropian vendosi të ndihmojë Greqinë me një fond prej 700 milionë eurosh për të përballuar krizën ndërsa Turqia thotë se ndihet e tradhtuar nga NATO, e cila nuk po reagon pas asaj që po ndodh në Siri.
