Rreth orës 06:30 të mëngjesit të sotëm, ka lënë qelinë e burgut Fredi Beleri.
Dalja ndodhi ashtu siç ishte parashikuar, me lejen e dhënë nga Drejtoria e Burgjeve, Beleri ka lënë qelinë në burgun e Fierit për t’u nisur më pas drejt Parlamentit Europian ku do të bëjë betimin si eurodeputet.
Ai është pritur nga një mjet me targa diplomatike greke, dhe nga familjarë e mbështetës të tij. Për mediat greke ai tha se i falënderon për mbështetjen e dhënë dhe se të tjerat do t’i thotë në Athinë, ndërsa për median shqiptare do të flasë në aeroport.
Një ditë më parë, drejtoria e Burgjeve i dha 5 ditë leje për të udhëtuar drejt Strasburgut për t’u betuar si eurodeputet i zgjedhur nga radhët e partisë Demokracia e Re në Greqi. Beleri kishte disa ditë që kishte kërkuar leje për të dalë nga qelia, por vetëm këtë të diel komisioni në Drejtorinë e Burgjeve është bindur për të miratuar kërkesën e tij.
