15 nxënës të shkollës 9 -vjeçare të Hotolishtit dhe 400 banorë të fshatrave Çerçan dhe Dardhë rrezikojnë jetën duke kaluar në një shteg buzë lumit Shkumbin pasi rrugës i ka dalë “pronari”.
Rreth 800 m të rrugës janë rrethuar me tela nga firma “Remi” shpk, që në vitin 2007 ka marrë me koncesion ndërtimin e Hec Egnatia në Librazhd. Në vitin 2015 ish-komuna e Hotolishtit mori vendimin për hapjen e rrugës, vendim i cili deri më sot nuk u zbatua asnjëherë.
Një nxënës thotë për Fiks Fare: “Unë e kam mbajtur dhe ndihmuar disa herë motrën e vogël pasi ka rrezikuar të bjerë në lumë. Prindërit na shoqërojnë gjithmonë pasi kemi frikë. Nuk na lënë vetëm. Tek rruga kemi frikë të kalojmë pasi na shajnë dhe qëllojnë rojet e firmës private” –pohon ai.
“Pronari” i ri i rrugës është administratori i firmës “Remi” SH.P.K, Ismal Leka. Në vitin 2007 kjo firmë fitoi të drejtën e koncesionit dhe ndërtimit të hidrocentralit “Egnatia”. Në atë periudhë kanë filluar konfliktet e para me banorët e zonës, pasi e akuzonin administratorin për përvetësim të pronave të tyre. Kjo nëpërmjet falsifikimit të dokumenteve, siç pohojnë vetë banorët .
Në vitin 2017 Ismal Leka, bashkë më noterin Kujtim Kaca u arrestuan pas një hetimi të krimit ekonomik në Elbasan. Sot proceset gjyqësore vazhdojnë dhe ende nuk është marrë një vendim përfundimtar. Ndërkohë që sipas banorëve ai është në gjendje të lirë dhe vazhdon të mos i lejojë të kalojnë në rrugën e fshatit. /TCH
