Agim Arapi, 51 vjeç, u rrah me grushte e shqelma brenda në dyqanin e tij ushqimor deri sa dha shpirt. Ngjarja e rëndë ndodhi dje rreth orës 20:00 në lagjen nr.1 të qytetit të Durrësit në bulevardin “Epidam”.
Sipas policisë autorët janë vëllezërit Kostandin Ekonomi 54 vjeç dhe Kujtim Ekonomi 50 vjeç, banues në Durrës. Sherri ndodhi për një tub aspirimi. Jurgen Kurti i detyrohej viktimës një shumë prej 130 mijë lekësh të reja për tubin e aspirimit të picerisë që kalonte nëpër marketin e viktimës.
Viktima i ka kërkuar Jurgen Kurtit paratë por ky i fundit pas sherrit me 51 vjeçarin dhe gruan e tij ka thirrur në ndihmë vëllezërit Ekonomi (njëri prej tyre është babai i të fejuarës së Jurgenit).
Dy vëllezërit e kanë futur Agim Arapin brenda në dyqanin ushqimor, kanë mbyllur qepenin, dhe e kanë goditur me grushta e shqelma. Gjatë kësaj kohe Jurgen Kurti ka qendruar jashtë dyqanit.
Policia tha se në vendin e ngjarjes është gjetur një thikë, por që dyshohet se vdekja 51 vjeçarit nuk i ka ardhur nga thika por nga grushtet. “Nga ekspertiza mjeko- ligjore u vërtetua se shtetasi Agim Arapi ka ndërruar jetë për shkak të problemeve që ka pasur me zemrën, ku nuk ka përballuar dot goditjet me grushta”, tha policia e Durrësit.
*Viktima Agim Arapi
Precendentet e Jurgen Kurtit
Jurgen Kurti nuk është një emër i panjohur për drejtësinë dhe për publikun. Një vit më parë, pas një sherri në familje, mbeti i vrarë babai i tij. Në sherr kanë qenë dy prindërit, Jurgeni dhe daja i tij. Fajësinë për krimin e mori daja dhe 24 vjeçari la burgun brenda pak muajsh. Një skenë e ngjashme me protagonist, Jurgenin përsëritet sërish në Durrës.
Ai kishte marrë një piceri me qira në Durrës ku jeton edhe e fejuara e tij (vajza e autorit të krimit Kujtim Ekonomi). I gjithë debati është zhvilluar për një pagesë 130 mijë lekëshe.
Kur është hapur piceria, është rënë dakord që tubat e aspirimit të kalojnë nëpër marketin e Agim Arapit, kundrejt një qiraje prej 130 mijë lekësh në muaj. Jurgen Kurti nuk e ka kryer pagesën e muajit Mars dhe viktima bashkë me të shoqen i kanë kërkuar paratë, por Kurti ka thirrur vëllezerit Ekonomi, të cilët rrahën për vdekje 51 vjeçarin. Siç njofton edhe policia Jurgen Kurti nuk është arrestuar, por thjesht shoqëruar për tu marrë në pyetje. Mbi të nuk rëndon sërish asnjë akuzë…
