Guxim Gjyriçi ishte duke mbyllur lokalin e tij mbrëmjen e 5 janarit kur një makinë pa targa iu afrua dhe nga xhami i saj persona ende të paidentifikuar qëlluan mbi të duke e lënë të vdekur. Këto janë pamjet e kamerave të sigurisë që ekspertët e kriminalistikës po analizojnë për të zbardhur ngjarjen.
Sipas policisë ngjarja ndodhi në orën 23:32 në lagjen “Partizani” në Tropojë ku Gjyriçi kishte dy bizneset e tij, një lokal dhe një karburant, ndërsa pak metra më larg ndodhej banesa e tij.
Autorët mesa duket ishin përgatitur për të kryer ekzekutimin për arsye se ata e kishin ruajtur atë deri kur ai të mbyllte lokalin në mbrëmje, kur ata mund të përfitonin edhe nga errësira për të humbur gjurmët e tyre.
Guximi, 47-vjeç ishte prind i tre fëmijëve dhe sipas dëshmive të banorëve të zonës ishte njeri i qetë dhe pa probleme. Mësohet gjithashtu se ai ka lidhje me fisin Haklaj, konkretisht ai është djali i tezes së Fatmir Haklajt, ish drejtori i komisariatit të Tropojës në vitin 1997. Kjo familje është bërë e njohur për shkak historisë së saj tragjike ku kanë humbur jetën pothuajse dhjetëra persona si pasojë e gjakmarrjes.
Megjithatë për vrasjen e Gjyriçit ende nuk ka një pistë zyrtare dhe policia në njoftimin e saj shkruan se rrethanat janë ende të paqarta ndërkohë që disa persona janë shoqëruar në komisariat për tu marrë në pyetje.
Policia e Tropojës, Kukësit si dhe dy grupe të FNSH ndodhen në zonë dhe po bëjnë kontrolle intensive për kapjen e autorëve të cilët ende nuk janë identifikuar. /Opinion.al
