Detaje të reja kanë dalë në mediat greke në lidhje me kapjen e sasisë prej 1 ton kanabisi në Greqi, e cila ishte nisur nga Shqipëria dhe kishte si destinacion final Turqinë, prej ku do të shkëmbehej me heroinë.
Gazeta Protothema ka publikuar foton e gomones së dytë, e cila në fillim i shpëtoi policisë greke, dhe shkruan se ajo u pikas nga peshkatarë të zonës.
“Të dielën peshkatarët e zonës kanë parë një gomone me dy motorë 350 kuaj fuqi secili dhe pranë tij një person që notonte në tentativë për të dalë në breg. Menjëherë u njoftua policia, e cila mbërriti në vendngjarje dhe shoqëroi personin, që rezultoi shtetas shqiptar. Gjatë marrjes në pyetje shqiptari e ka mbajtur gojën mbyllur, por hetuesit kanë kuptuar se bëhej fjalë për gomonen e dytë që i iku ndjekjes policore.
Nga hetimi arritën në përfundimin se droga duhet të ishte fshehur diku në Sporadhes. Sot në mëngjes nisën kërkimin shpellë më shpellë dhe arritën të zbulonin drogën ne ishullin e vogël Piperi. Ajo që po hetohet është fakti nëse kjo sasi është e gjitha ajo që do të shkëmbehej me heroinë në Turqi apo një pjesë e saj dhe se si u fsheh në këtë zonë”, thuhet në shkrimin e “Protothema”. /Opinion.al
