Fitorja 3 me 0 e Juventusit ndaj Barcelonës në ndeshjen e parë gjysmë finale të Champions League duket se ka rritur emocionin edhe tek fansat shqiptarë të klubit italian. Kjo pasi shanset për të kaluar në fazën tjetër të kampionatit evropian janë më të larta.
Tifo grupi shqiptar i Juventusit ka menduar deri në detajin më të vogël për organizimin e radhës, në ndeshjen e kthimit që do zhvillohet në Barcelonë. Në pamundësi për ta ndjekur live, tifozët kanë mbyllur Pallatin e Sportit “Asllan Rusi” dhe kanë ftuar të gjithë fansat e Juves për të ndjekur bashkë ndeshjen në një atmosferë të jashtëzakonshme.
Për më tepër, shoqata e tifozëve ka përhapur njoftimin edhe në disa nga citylight-et në pikat kryesore të kryeqytetit.
“Sa e ka numrin zjarrfikësja”-shkruhet në banerat e shpërndara nëpër qytet duke paralajmëruar kështu një natë jo si të tjera./opinion.al
