Dy makina një “Mercedes Benz E Class Evo” dhe një “Nissan Navara” i kanë vjedhur në oborrin e lokalit dhe të shtëpisë biznesmenit nga Ndroqi, Tiranë. 43 vjeçari Gëzim Pojana ka denoncuar në polici se gjatë natës i kanë vjedhur automjetet e parkuara para lokalit të tij, në Lagjen e Re në fshatin Ndroq në periferi të Tiranës.
Dy makinat, siç duken edhe në fotot e siguruara e publikuara nga “BalkanWeb” janë të shtrenjta, njëra mercedes luksoz dhe tjetra fuoristradë.
Pojana ka thënë se nuk dyshon tek asnjëri dhe se nuk ka konflikte.
“Në mëngjes më zgjoi babai nga ora 5:00 dhe shikon që nuk janë makinat e më merr në telefon. Më pyeti se ku po shkoja, i thashë që jam në gjumë dhe atëherë dolëm me vrap dhe pamë që makinat ishin zhdukur. Unë nuk dyshoj tek njeri por ky duket që është plan i organizuar”, tha biznesmeni që ra pre e hajdutëve mesnatën e së dielës.
Ndërkaq ai tregon që një bashkëfshatar ka parë dy persona të dyshimtë në orën 11:00 të natës të kalojnë pranë lokalit. “Një bashkëfshatar na tha që kishte parë dy persona me fuoristradë para lokalit nga ora 11 e natës. Fatkeqësisht lokali nuk ka kamera por policia ka marrë pamjet e kamerave të karburanteve pranë. Grabitësit kanë thyer bravën e derës së jashtme të rrethimit dhe kanë hyrë brenda më pas ku kanë marrë makinat. Kanë përdorur kaçavidë se e kemi gjetur një pjesë në oborr”, tregon 43-vjeçari.
Policia deklaron se pronari i automjeteve ka bërë denoncim rreth orës 5:30 të mëngjesit në Komisariatin numër 6. Mësohet se 43-vjeçari ka deklaruar se çelësat e automjeteve i ka lënë brenda, për shkak se ato ndodheshin brenda rrethimit të lokalit. Nga pamjet e kamerave të karburanteve është zbuluar se autorët kanë kaluar në Romanat në orën 4:05 të mëngjesit. Pra mund të kenë ikur në drejtim të Durrësit ose Shijakut, duke llogaritur kohën që duhej nga Ndroqi deri në Romanat, policia ka dalë në rezultatin se vjedhja ka ndodhur 20 minuta para këtij orari. Policia ka gjetur bravën e derës të thyer dhe një pjesë të kaçavidës së përdorur.
*Foto: Makinat e vjedhura dhe brava e derës e thyer me kaçavidë
