Një shpërthim masiv preku të martën pasdite Bejrutin, duke shkatërruar thuajse të gjithë portin, duke dëmtuar ndërtesat përreth ku u thyen dyer e dritare, ndërsa një re gjigande në formë kërpudhe u ngrit mbi kryeqytet. Zyrtari i Kryqit të kuq libanez, Georges Kettaneh tha se ka të vdekur dhe persona të mbetur nën rrënoja, por ndonëse nuk ka një numër të sigurt, ata janë me qindra raste.
Një zyrtar i mbrojtjes civile, sikurse raporton AP, tha se njerëzit e tij kanë evakuar duzina personash në spital, por ka ende shumë trupa brenda në port.
Spitalet e mbushura me të plagosur tashmë kanë njoftuar mungesën dhe nevojën për gjak. Të paktën 400 persona të plagosur janë paraqitur në njësinë e emergjencave e ngritur pranë hotel “Dieu”, për këtë qëllim.
Shkaku i shpërthimit është ende i paqartë, ndonëse fillimisht u tha se bëhet fjalë për një depo fishekzjarresh. Kjo ishtye shokuese edhe për një qytet si Bejruti, i tronditur nga bombardimet izraelite dhe lufta civile.
Ndërkohë Ministri Jashtëm i Izraelit Gabi Ashkenazi ka mohuar çdo dyshim për lidhje të vendit të tij me shpërthimin e ndodhur. Duke folur për “Channel 12 News” në Izrael, ai tha: “Nuk ka asnjë arsye të mos besojmë raportimet nga Bejruti se ishte një aksident”./Opinion.al
